Aller à son potet No 30
Aller à son potet
Si j’té dis : La fille à Léouise est allée à son potet !
En v’la d’eune affaire. La fille à la léouise a prins ses clics et ses claques et ol est allée à son ménaège.
Tout l’monde sé bin qu’eun joue ou l’aoute i faout parti d’cez son monde pour vive sa vie.
I y’en a qui vont à lou potet tout sou, pasqué i z’ont lou travâil lin d’cez les pérents, d’aoutes qui partent pasqu’i sont assez vieues, et d’aoutes pasqu’i s’marissent et qué « aoutant d’mariaège aoutant d’ménaège »
Bin souvent est toute eune affaire d’aller à son potet.i faout lé troussiaoue pour eune jiène couêffe, lé gar’ lu bin souvent i compte sue moman, pour s’oqhuper dé tout l’la.
Astoure quand i vont à lou ménaège, i z’ont tout. Invention d’parti sans la bouête à goule, la machine à laver, dame ! n’est pue qhession d’aller au doué faire sa buée. Et jé n’té caouse pas dé toues les orceues électrics et affaires qué j’nous pâssions bin d’aoute faïs.
La fille à Léouise ielle ol est partie o son bonami, je songe qu’o s’ra bénêze o son chéri. Si l’la n’allait pâs comme o voudrait, ma faïs o s’en r’vienra cez moman.
Pasqu’anné, y a ténant d’monde qui r’viennent o lous pérents, la vie est bin dusse !!!
Pour s’y r’c’neute :
Invention : impossible
Lé doué = le lavoir