Chérette qui pigne va longtemps No 22

Chérette qui pigne va longtemps

Si j’té dis : «  Chérette qui pigne va longtemps ? »

Bin tu sais bin, qué quand t’iâs eune chérette qui couine, tu li met eun p’tit coup d’burette d’huile et o r’part en douceûr.

Bin l’monde sont pareil, des faïs, un p’tit coup d’huile dé cez l’méd’cign, l’la va mieue. Est pâs pasqu’i couinent qu’i vont d’funter. Ergardes pues tôes, les veues là qui pignent, i z’ont toujour ma à qhocs bouts, ça s’deue, ça geint. Et comme lé disait l’vaèsign :  « fid’garce ! i s’deue et huche pue haout qui n’a ma, jé s’rait coti avant lu ! ».

Est dans ieues l’la, dé s’deude démême,  i faout qu’i  frint  accrêre es siens qui veulent bin faire eun p’tit attention à ieues qui sont près à qerver.

Y a aoussi des couêffes qu’ont té toute lou vie faillies , et bin, quand o z’ont lé moinde ma, i faout gémi un p’tit . Nous qu’avions du monde pâs trop tende, quand j’avions ma comm’ tout l’monde, i n’faulait pâs v’ni quérier dans lous pattes, pasqué i nous disaint : « allez don à vote travâil, sacré pignouses. »

N’est pâs tourjou eune bonne idéye dé pigner d’même, pasqué quand i s’ront près à pâsser dé l’aoute bôrd,  lé monde né l’crérons pâs.

Pour s’y r’c’neute :

s’deue, sé deude = se plaindre

accrêre = accroire

ête faillies = être fragiles

quérier =  pleurer