La Fontaène et Moliêr dévisent ent’ieux au péye des d’funts .No 172
La Fontaène et Moliêr dévisent ent’ieux au péye des d’funts .
- Eh bin, mon amin, v’allez ti z’ieuter eun p’tit sue sue la terre qhoc faïs ?
- Ian, bin sûr , et j’vouèye bin qué l’monde sont tourjou pareil.
- Vous n’ergrettez pâs d’ava écrit sue les rapias d’aoute faïs ?
- Ah ! Nân’ni tout comm’, les rapias d’ané sont comm’ les veutes dé hiêr. Pue i n’n’ont, pue i z’en veulent, et si jé caousé d’Harpagon o sa génochée d’ôr qu’avait té prinze, astour n’est pue à l’hôté qui z’ont lou ghézon, mée au crédit et comme i n’veulent pâs en lâcher ene miette, aoussi bon qu’i z’araint des roches à la pllace pisqué l’la, né lou sert à rin.
- Bin, maï j’avâs caousé du leu et d’l’égnet, vez bin veuie qué i y a tourjou des leues qui abiènent les pétits ,. Côr pue fôrt, i y en a aoussi qui n’ont auqheune géine à prende la flleur des pétits, gar’s ou filles !
- Mon brave, v’aviez aoussi écrit qué i n’faulait s’attende qué ta même, ergardez sue la terre ané, ténant monde n’veulent point trop s’cafater et i z’attendent tout des aoutes , i faura pourtant bin s’beuger eun p’tit pasqué si veulent ava qhocs mouèyens, ça n’lou chéra pâs tout qhié dans l’bé.
- Dans mes souv’nances, v’aviez écrit Tartuffe , sue les dévots. Là ! j’avions bin rigolé, et des Tartuffes i y en a tourjou.
- C’est ti pâs vraï qué « pour ête dévot jé n’en sont pâs moins homme » !
- Et, les couêffes peuvent bin dire aoussi, qué « o z’ont bin du r’gret qué la loi né lou donne pâs l’dré dé changer d’bonhomme aoutant qué d’chéminzes. »
- Si o n’ont pâs l’dré, o prennent lé gaouche . I y a tourjou des coqhus imaginaires mée aoussi des coqhus contents..
- Ah ! bin i y a toujou aoussi des malades imaginaires, jé n’pourrons rin y changer !
- Et les veuies qui sont bin malades , qui s’raint qhu d’jatte,qhu teuies, gouteues où manchots, quand i verront l’Ankou appercher o sa faoue s’erqhul’rons tourjou pour né pâs en attraper eun coup.
- Vous vouèyez bin , jé n’en changérions pâs eune ligne ! surtout o tout s’qui s’pâsse ané.
- Mée i faurait ajouter asteure qué si nos couêffes sé pomponnaint en s’poudrant lé païe et en s’foutant du sent-à-bon partout pour qhuter lous rafoins , ielles d’astoure font jouer du bistouri et s’tirrer la piaoue pour gangné qhocs anéyes.
- Est pour élla qui i y en a qu’ont les beurnes et les babouines grosses comme si o z’allaint péter et les zieues si tirés qu’i peuvent même pâs rigoler
- Mon cher La Fontaène pisqu’est d’même, souétons qué i y ara bin des rigoloes qui mettrons l’la dans eun thiâte, et dans deues cent z’ans, l’monde en caouserons côr.
Abiènent = mangent, s’approprient
qhu teuie = cul tordu
lous rafoins = leurs odeurs nauséabondes corporelles
les beurnes = les seins