Eun maîre n’est pâs tourjou bénèze No 163

Eun maîre n’est pâs tourjou bénèze

-         O les fêtes là, Torine, tout l’monde a l’occâsion d’bêre son p’tit coup.

-         C’est bin vraï, i n’faout pâs ête fiêr et n’rin bouêre, pasqué l’monde diraint qu’on s’déc’neuie.

-         Ian, bin si t’iétâes l’maïre du villaège, l’la s’raint d’aoutes chaouses tourjou.

-         Ta aoussi t’iâs leuie lé p’tit billet o plein d’malice sue not journa ?

-         Rin d’bin monvais, jusse eun bignement d’zieue pour lé maîre vouésin ;

-         I n’tait pâs chaoud d’bouêre, i l’avait vantiée haoussé l’queuïde , deues ou traès faïs o ses amins qui fêtaint les Roués, est bin tout.

-         Est pâs pasqu’i bourdit sue son prêche, qui faout li en voula.

-         Et pis est lu qui l’dit, comme si i l’avait té à la confesse.

-         Pêché avouè est à mouétié pardonné. Ça dé ête eun brave homme , eun bon vivant, eun bonhoume comm’ j’les aimons . I n’peuvent tout comm’ pâs dire nân’ni à tout !

-         Jé sérions bin mâris si l’nôt’ né v’nait pâs, quand j’fésons nos p’tites fêtes dé quartier haousser sa bolée o nous et si r’fusait l’la , lé monde diraint qu’i l’est trop faraoud et pue tard…..

-         As tu songé , Torine qu’astoure, quand j’avons eune cérémoniye , lé maîre dit min à toutes les couêffes ?

-         Ça c’est bin vra, i m’fait eun coti comm’ es aoutes.

-         I l’aim’rait sûr’ment mieue eun jiène couêffe qué ta, mée i n’fait pâs dé différence.

-         Dis don Fifine, jé sé côr en biaoue non fait ?

-         Jé t’chine Torine, tu sais bin. N’y a pâs conte, lé nôt’ n’est pâs fiêr eun brign.

-         Pourtant, les v’là astoure qu’i z’ont d’aoutes affaires à faire, dépée qhocs annéyes démésé, les v’la qui font des batêmes et des enterrements.

-         Eun batême, l’la n’est pâs trisse et aprèe i dèvent bin aller baèzer eune bolée.

-         Vère dis-je ma. L’la né dé pâs s’faire à eun enterrement bin sûr, i n’peut même pâs gouti lé vin d’mônsieu l’recteûr durant la cérémoniye.

-         Ah dame nân’ni , pasqué est dans l’moment là qui s’mettrait à boudicher, en prêchant  sue lé d’funt.

-         T’iâs raèson Fifine, c’est pâs toujou haètant d’ête maïre astoure !

Pour s’y r’c’neute

s’déc’neuie= se déconnait

eun bignement d’zieue = un clignement d’œil

chaoud d’bouêre = éméché

haoussé l’queuïde = lever le coude

i bourdit = il cala

faraoud = fier

dit min = il embrasse

eun coti = une bise

jé sé côr en biaoue = je suis encore en état

N’y a pâs conte = il n’y a pas d’importance

à boudicher = à bredouiller