Panique à la qhaisse du super F. et T. No 53

Panique à la qhaisse du super

-         Ah ! ma pôve Torine, jé cré qué j’perds complét’ment la boussole !

-         Non ! tu cré ?

-         J’t’âs à  faire mes commissions at matinée, jé z euie la honte dé ma vie !

-         Pourqhi don, t’avâs pâs assez  d’monâe, ou t’avâe pâs ton carnet vantiée ?

-         Nân’ni, rin d’tout l’la, mée quand j’ai persenté mon chèque, la qhaisssiêre m’a d’mander ma carte d’identité, et là, invention d’mette la main d’sus.

-         Tu sais bin qu’astoure i faout tourjou la carte d’identité, songes don si tu v’nâes à faire un chèque en bouée !

-         Oh ! nân’ni, j’en sé pâs côr rendue là, et j’trouve qué c’est vra norma, d’habitude ol est tourjou dans mon carnet et j’fis des chèques hiêr ol tait bin là !

-         I n’faout perde lé parchâe là tu sais bin !

-         I n’tait pâs perdu non pue, et pis j’avâes ma carte dé banque !

-         T’étâes parée aloure !

-         Bin non, paqu’o m’a dit , j’ai tapé qu’v’ariez pouèyé o eun chèque. J’ai vêssé tout c’qui avait dans mon sac,. Tout d’un coup ol a veuie ma carte verte dé la séqhu,<<oh ! bin ,qu’o m’a dit , j’vâes prend’ cet’la !>> pis o c’est avisée<< vez vantiée vot’ permis d’conduire ?>> Bin sûr qué l’avâes pourqu’a don qué jé n’y avâes pâs songé toute soule ! Jé n’sais pâs pourqua au moment là, j’ai m’sé embistrouillée o tout c’qui avait sue l’tapis d’la qhaisse ! Eune couêffe drêre maï s’mettait à rire jaoune, probab’ qu’o perdait eun p’tit patience. Tout d’un coup j’ai r’songé qué ma carte d’identité tait… dans la pouchette dé mon porte carnet , éyou qu’ol est tourjou !

-         T’avâes pâs l’air fine ma pôve Fifine, mée j’comprends bin , j’allons tourjou qri ayoue les chaouses qui sont trop bin à lou pllace!

-         I faout dire étou qu’les sacs des couêffes sont tourjou plein, lé mien est comm’ les veues des aoutes :

-         Ian, lé mien étou et pourtant j’n’avons pâs les crèmes ni les peintur’lures qué l’z’aoutes ont !