La grill’rie d’chätôgnes F. et T; No 48

La grill’rie d’chätôgnes

-         Bin l’bonsaïr à tertous !

-         Bonsaïr Torine, t’âs ti chaoud at’sa ?

-         Nân’ni, lé temps s’est bin erferdit ! Oh ! mée v’la l’harassouêre sortie, t’âs ti té es châtôgnes ?

-         Vère jé sé allée dica dans l’Vä, éyouc qu’sont les vaches à Claude à pâturer !

-         Sont ti belles éc’t’année ?

-         Nânn’ni, i n’y a pâs z’euie assez plée, ma pôv’ ! Mée, aperches eun assiâe, et vient t’assir dans l’coin du fouyé, j’allons en griller qhocs z’eunes !

-         Jé n’voudrâe pâs vous enneye, mée j’veue bin en manger eun p’tit !

-         Tu voué, j’ai commencer à en préparer, j’lou z’ai fait eune encoche, Fais tu l’la étou ?

-         Ian binsûr , j’lou z’enlève eun p’tit d’piaoue, aouterment i pétrint et y en arait dans toute la place !

-         J’ergarde quand même aoussi qui n’arint pâs trop l’qhu plissé, i paraît qu’est les vérouses qui sont d’même !

-         Eh ! bin ! v’la  ti eune bonne fouée !, çà va faire du bien à nos veilles qhettes, j’commençons à r’senti l’fré sue nos vieues oes !

-         Dis don Torine, mon bonhomme à tirer eune pichiérée d’cit nouviaoue, qhic tu dirais d’bouêre un flip ?

-         Jé n’sé tout comm’ pâs v’neue pour bouêre !

-         Dans l’temps, j’en beuvions bin et d’bon qhoeur !

-         Dame, i fâllait bin pâsser les sérées, moman et ses vouésines brodaint des chaousses à lou bonhomme ou à lous garçâilles, popa faisait des canoches o la bourdaène qui l’avait té qheuter dans l’Vä justénément, sue l’bôrd du russet

-         Jé m’rappelle bin d’élla, est lu qu’avait apprin à mon pêre !

-         Tu les voué astoure au mitan d’la salle à manger à faire lous man’qhins ?

-         Jamée j’n’arâe la patience dé vaire élla, j’les frâe décaniller en vitesse !

-         I y en a pue d’bésoin non pue, et astoure est eune pièce pour châque chaouse ! Tiens, j’ai envie d’houper à ton homm’ Torine, i n’va tout comm’ pâs rester tout sou cez lu !

-         T’âs raison Fifine, çà n’va pâs li déplaîre du tout !

 Pour s’y r’c’neute :

Harassouêre = la poèle à trous

châtôgnes  = châtaignes

l’Vä, = nom du champ parcequ’il est au fond d’une vallée

eun assiâe = sur quoi s’asseoir

i pétrint = pétraient

eune pichiérée = un pichet (le contenu)

un flip  = boisson chaude à base de cidre doux additionné de goutte( alccol)

des chaousses = des chaussetes

des canoches =  man’qhins = grand paniers pour ramasser pommes ou pommes de terre

décaniller = dégager

d’houper = d’appeler