Ercommandâtions à Fifine No 33 F et Torine

Ercommandâtions à Fifine

-         Allez ma p’tite Fifine, jé viens té dire à la r’vouèyure !

-         Çà yée, v’êtes prée ?

-         Ian, et j’té donne la clé, tu f’râs bin attention, la claveure est eun p’tit dus’, i faout l’ver la pognée , aoterment o n’sé frome pâs !

-         T’âs bin sorti l’nourri au chat ?

-         Ian , bin sûr, j’lé mins sue la tab’ dé l’abâs, t’ergardrâs bin , pasqué est un finaoud, i s’qhute des fâïs sous l’z’étagiêres es bouteilles ! Est qué j’n’voudrâs pâs qui frait trop d’salop’ries !

-         T’en fais pâs Torine, jé frais attention !

-         Si y avait qhocs ôraèges, ergard’ bin tourjou, pasqué mon coff’ à grôe est plein, j’té montré éyouc qu’est l’comteur !

-         Ian, ian, mée tu t’tracasse don bin !

-         Ah ! les pouliaoues ! lé grain est dans l’célier , comm’ j’té déjà dit, j’donnons eun tour dé clé aoussi, on n’sé jamée, tu vâs vair, i faout tirer l’husset assez dü, la clenche n’est pâs commode !

-         Et tes fleurs ? J’y vâs quand même lou mette dé l’iaoue ?

-         Pâs avant deues ou traès joues, j’lou en ai mins avant d’parti. La veute dévant la f’nête dé la salle, o n’a pâs tant bésoin qué l’z’aoutes, mée ielles qui sont dans la véranda, in’faout pâs l’z’oublier, jé s’râe bin déplésante tout comm’

-         Tu peux bin parti tranqhile, j’ergardrais partout ! T’es côr là ? Qhic qu’attends don ? tu n’voué pâs ton bonhomme qu’attend ?

-         I va côr attend’ eun p’tit , lé temps dé t’faire un coti, et dé t’dire min

-         A la r’vouèyure et erposez vous bin ! << ah ! Veutes là, on voué bin qui n’partent pâs ardi !>>

       Pour s’y r’c’neute :

la claveure est eun p’tit dus’ = la serrure est un peu dure

n’sé frome pâs  = ne se ferme pas

l’abâs = pièce qui servait de débarras

les pouliaoues  = les poulets

l’husset  =  partie haute d’une porte à deux battants superposés

bin déplésante  = bien en peine