Lé huchoué d’pouchette No 10
<< -Torine : qhic qu’t’âs don à hucher d’même ?
- Entère , jé sé au téléphone !
- Et , est pour élla qu’huches si haout ?
- Bin sûr, i faout bin qu’ma belle sœur mé ouèrait , tu sais bin qu’ol est à l’aout’ bout d’la France !
- N’y a pâs chouée, t’âs côr rin comprins ! i faout caouser comme t’ias l’habitude ! Heureus’ment qué n’est pâs au mitan du super marché qu’tu téléphones !
- Pour qhi qué j’téléphon’râes du super ?
- Tu n’les voué pâs astoure lé monde i sont d’vant les bocalées d’cornichons, i n’savent pâs les qheues prende, aloure , un p’tit coup d’fil à la bourgeouaise et les v’là bénèze !
- Est ti pour élla qu’t’ias aj’ter un huché d’pouchette neu ?
- T’âs veuie l’la taï ?
- Ohhh ! t’es comme les aoutes , t’aimes bin faire dé l’embarâs et faire vâe tes nouviautés !
- Ian jé viens d’l’aj’ter , mon vieue n’tait vraiment pue bon, et tu voué c’ti ci est tout comme moins lourd dans la pouchette !
- Il est vra biaoue, mée maï , jé cré qué j’s’râs bin en pouène dé m’en servi !
- Ella n’est pâs bin duss’, mée élla est vra pratique quand j’allons en dévarinade ! J’vâes t’dire, lé pue dûr est dé l’chouési !
- Ha ! Ha ! maï jé cré qué si t’ias du ghézon dans ta pouchette est tout qhi qui faout !
- Eh Bin ! nânni ! Quand t’entère dans la boutique, i t’font l’artic : et c’ti ci va o l’ordinouêr, c’ti ci, vous pouez envouèye des méssaèges à jé n’sé you ! et même i peut kodaké ! J’fini tout comme par li d’mander :<< I téléphone au moins ?>>
- I n’arait pue manqué qu’çà ! Mée j’té dis qu’élla n’est pâs pour maï !
- Et maï , j’té dis qu’on voué bin qu’t’es jamée sortie d’ton trou ! Là ! >>
Pour s’y r’c’neute :
N’y a pâs chouée = Il n’y a pas d’importance !
les qheues = Les quels
un huché d’pouchette = un portable
en pouène = en peine
bin duss’ = bien dur
dévarinade = balade
du ghézon = du fric
i t’font l’artic = il te font la réclame