Fifine et Torine No 4

Fifine et Torine

en balade !

       <<  Nous v’la à Lamballe, mée éyouc qu’j’allons aller ?

-         en v’la eune qhession ? J’irâes bin maï, dica Notre Dame !

-         est eune bonne idée , çà fait belle lurette qué jé n’y sé pâs montée !

-         tu veuie ti y monter à pied ?

-         Pourqua pâs, élla nous f’rait du bien d’marcher un p’tit

-         Çà ché bin v’la l’escalier pour y aller !

-         Tu veue griper là ? mée âs tu au moins idée dé combin d’marches qui y a à monter ?

-         J’ai cherché sue mon ordinouèr et j’n’ai rin veuie la d’sus, j’ai jusse vu qué les parisiens l’kodakent ardi, j’lé veuie sue lous blogs

-         Bin jé n’sé pâs d’assent pour prende lé ch’ming là, j’aime bin mieue prende la route….. ….

-         Bon nous i v’la, jé n’t’âs pâs ervénue dépée qu’les vitraoues ont té r’fait, est domaège qué la porte dé Collégiale est clavée

-         Fallait v’ni l’aoute sémaène , i avait eune belle esposition d’peinture !

-         Tu voué tout Lamballe d’illé, ergardes, on vouè dicau collège, et même tu pouras erc’neute lé monde qui sont gârés en d’sous !

-         Dis ma Torine, j’vâes aller sue la pllace éyouc qu’faisions des relais quand j’étions au collège !

-         Ah ! ta étou ! t’ias des souv’nances du temps là !

-         Jé n’sé pâs côr assez adiotée pour né pâs m’en souv’ni ! j’pourrions en conter la d’sus !

-         Vère , mée eune aoute faïs !                                   

Pour s’y r’c’neute :

eune qhession  = une question

Çà ché bin = çà tombe bien

griper là  = grimper là

ordinouèr = ordinateur

d’assent = d’accord

clavée = fermée à clé

adiotée = devenue folle