V’la l’biaoue temps !

V’la l’biaoue temps !

Quand j’ai m’sé évouèyée à mating, malgré qu’j’avâe les z’yeues toues bézioues, jé mins l’nez à la f’nête, pour vair qué les cllos taint côr bin blancs , j’ai songé qu’j’arâe bin fait d’rester dans mon lé, j’étâe si bin nigée ! i l’en faout du couraège s’pâs ! mais i n’faout pâs trop songer à rester élongée , est d’même qué j’dév’nons des féniants.

Quand j’sé arrivée à déjéner, j’ai l’ver les z’yeux sue ma qhuisine, oh ! dame, lé soula donnait sue des fis d’irangne Jé m’sé dit, i va falla t’prende par la main, ma vouéille et commencer l’ménaège dé printemps !

V’allez pâs l’crêre, et bin dès qu’j’ai zu avalée ma bolée d’mic, j’ai éfidirangné et commencé à laver mes câraues.

I l’a fallu qué j’jouque sue eune échielle, est qu’çà n’est pue aisé pour nous les veilles, i n’faout pâs s’casser bras ou qhettes, jé n’tons pue lesse !

Et pi qheule idée qu’j’avions z’eue d’mette des p’tits caraues ! Ah ! i sont bin pue futés qu’nous les jiènes o lous f’nêtes o des grands câraues, un coup d’pillot o dé l’iaoue savonnouse un coup d’râclouêre et l’affaire est net bin !

J’ai sé tout com' bénèze, i fallait bin commencer, et astoure i faura continuer. I n’faout pâs tout faire lé même jou ! Ah ! Dame nân’ni !

Fleur de Blé Noir