/https%3A%2F%2Fprofilepics.canalblog.com%2Fprofilepics%2F4%2F7%2F473271.jpg)
Yarn bombing à Qhessouée No 196
Yarn bombing à Qhessouée
Texte traduit aujourd'hui par une lectrice sur son blog :
http://tatisoize.canalblog.com/archives/2013/10/15/28218290.html#c58104815
Merci à elle
I s’pâsse tourjous qhocs chaouses à Qhessouée ! Mardi la matinéye, l’la s’pâssait à la bibliothèque pour l’ertour dé la couêffe qui la tient, après ava éfanté, son amine Soize li avait fait eune belle surprinze. Fifine i était !
- Ah, o l’avait d’biaoues z’yeues la Fanny, quand o l’est érivée à la bibliothèque, lé matign là. Jé t’dis Torine qu’o l ‘tait toute ébaoubie . Ielle qu’avait songé à périer les binvoulants pour lou pouéyer eun mic et des p’tits gâtiaoues, pour ava mins au monde sa p’tite fille.
- Qhi qu’o l’euie d’même don ?
- Soize qu’avait gran’poue qué Fanny en arait z’euie vent, avait d’mandé à ses aminettes blogouses, toutes qhoeurues d’broch’rie, rinqu’des attéïnées sue les broches.pour mette sue bout eun « Yarn bombing »
- Qhi qu’est qu’élla ?
- Tu voué bin en ville , y a du monde qui font d’biaoues dessins o des bombes, l’la met d’la couleûr sue les murs
- Tu trouves élla biaoue ta ?
- Ian,des faïs , mée là n’tait pâs o d’la bombe, tait o des ouvraèges en brod’ries dé toutes les couleûrs
- Qheues ouvraèges , qui pouées bin ava fait ? d’z’affaires pour la pétite ?
- Nân’ni, des ghipendiaoues qui chéyaint d’eune chandelle au mitan d’la salle, éyouc qu’taint crochés des papillons dé toutes les coulours. Soize avait dica brodé des chaoussons pour mette es pieds d’z’assiâes, des chaoussons comme ieues à Peter Pan
- Tait ielles qu’avait tout fait alours,
- Mée nân’ni, o l’taint plusieûrs a ava brodé : Choco BN avait fait des biaoues sacs pouélus vra coulorés, rigoloes comm’ tout. Eune, aoute qu’avait fait plein d’tricotins comm’ j’en fésions dans l’temps. Lyse avait broché des doudous, même des p’tites bêtes qué jé n’vérrons jamée comme eune espèce dé vispi pue long qué tu n’peu même pâs songer, o deues têtes bin aimab’. Soize avait croch’té et brodé des fighures dé soula, d’ouéset et aoussi d’eune gentile bête qu’o avait mins sue les dossiers d’chaîses.
- N’iporte qua ! Est ti lou p’tits noms ?
- Bin sûr qué non ! est eun surnom qu’i sé sont donné pour faire lou blog. D’abôrd est d’même qui sé sont ac’neutes . i y avait dica Quercus qu’avait gripper sue eun escabiaoue pour crocher les ghipendiaoues.
- O n’avait rin broché ielle ?
- Ah Nân’ni pasqué n’est pâs eune couêffe , i faurait vair, vantiée qué si i l’avait des broches et d’la laène dans les poques, i nous frait eun biaoue cache-née !
- Qhi qui sait ? ça s’rait eune aoute affaire du coup là ! tout c’qué j’peux té dire est qué n’n’y avait du pllaisi lé matign là !
Avair z’euie vent = avoir entendu parler
Brocherie, broderie = 2 mots pour le tricot
Des attéïnées = des acharnées
des ghipendiaoues = des choses qui pendent
eun vispi = une vipère
/https%3A%2F%2Fassets.over-blog.com%2Ft%2Fcedistic%2Fcamera.png)