I sont côr à pa No 123
I sont côr à pa
- Oh ! Ma paôve Torine, j’érive du villaège d’à haout là, i sont côr à pa !
- Qhic qu’i zont côr, i n’sont pourtant qué deues hôtés ?
- Ian mée deues hôtés éyouc qui n’c’neussent qué la jalous’té
- Jé sé bin qué dépée tourjou i n’pouaint déjà pâs s’vair, mée est côr pire dépée qué les brus sont érivées.
- Ah dame, n’est pâs les mêmes tu sais bin, en pue la Julie ielle ol est châete cez du monde qui sont toues mié, qué Jeânnette ielle n’est pâs d’même i lâ prennent pour la chambériêre.
- Ian pa et son bonhomme qu’est tourjou erchigné, o n’dé pâs est bénèze dans l’hôté là !
- Ma pâove fille, ol est bin d’assent o ieues, o n’est pâs la deniêres à m’ner l’draoue !
- Tu cré Fifine ? jé n’l’arâe pâs creuie, son monde né sont pourtant pâs d’même.
- Bin ol a bin apprins sa l’çon, pas qué lé paô pétit à Julie tait dans l’aîre o ses bébiaoues, sa bérouette lâ géïnait probab’, o l’ créli bin dusse.
- L’z’aoute n’ont rin dit ?
- Ah Sia tout comme ! Et v’la la hache dans l’bouée ; les deues jiènes couêffes sé sont pouillées, t’arâes ouit l’la, tu s’râes chaète sue l’qhu ; la Julie, qui parée toute boudette et qu’est ni pue ni moins, miellouse comme comme toues à l’hôté, o n’a bégué pour la z’incendier.
- Du coup là est d’la monvétié tout comm’
- On lâ voué pourtant dans l’bourg, bin haètante, qui fait des riries à tout l’monde !
- Dame ol est héreuse bin sûr, pasqu’i lâ portent dé grand, o sont à vende à deues marchands aoussi ; cett’ ci est bin pue fine qué la Jeânnette.
- Jé cré qui sont tourjou à chine-chien, quand l’la va eun p’tit mieue, i z’r’mettent eune couche. I y a qhoc temps, l’homme à Julie tait à frembouèye dans l’clôe à côté dé cez Jeânnette, ielle qu’avait mins ses drâes au hâle, j’té dis qui sentait à bon.
- Ah bin, lu à Jeânnete fit aoussi bin l’aout’ temps là, i l’tait à égâyer lé jus dé ses pouères, i fit tout, pour qué çà giquèle sue l’mur et les fleûrs.
- Qheue jeu tout comm’ !
- Dame vère, i z’en font du potin.
- Est dé maoudits vespadiens les veutes là ! Et on s’démande côr pourqua qué dans l’monde, les pouèyes ont du ma s’ent’ endurer !
- Ian, pourqua ?
I sont à pa = à chine-chien = en querelle
La chambériêre. = la bonne à tout faire
m’ner l’draoue = mener le jeu
ses bébiaoues = ses jouets
sa bérouette = sa brouette
créler = gronder
bégué = bégayé
frembouèye = étendre le fumier
ses drâes au hâle = son linge à sécher
giquèle = éclabousse
du potin. = du bruit
vespadiens = énergumènes