Nos commêres sé débouillent cez l’couèfoue F. et T. (No59 )
Nos commêres sé débouillent cez l’couèfoue
- Bonjour à vous Mame Torine, assious illé
- Bonjour à vous Jack, jé sé toute soule à mating ?
- Nân’ni, vot’ copine Fifine, va arrivé toute sieute !
- Fifine ? Eh bin , maï qu’est mârie o ielle.
- Ténez, là v’la qu’arrive.
- Bonjour Mame Fifine, assious à côté d’Mame Torine, v’allez pouva caouser !
- Jé n’sais pâs si….. Oh ! Torine, déblâmes ma, qhi qui nous pris don l’aoute joue ?
- Déblâmes ma étou Fifine, ian tout comme, tout l’la pour des faillis pillaoues, j’avons bonne mine.
- Allez , j’n’en caous’rons pues !
- Qhic qu’on va vous faire Mame Torine, eune pétite teinture vantiée ?
- Oh,nân’ni, , mée j’aim’râes bin qhocs mêches, mon païe est eun p’tit gris, j’ai envie d’éssèyer.
- Des mêches blondes ?
- Des jaounes ? Nân’ni, mée en p’tit mâron rouge
- Vous voulez dire, auburn ?
- Ian mée pâs trop rouge tout comme, jé n’veue pâs ête rouqhine !
- Dis ma Torine, tu vâs t’les couper bin sûr, c’est pâs biaoue les gotons qui t’chéyent dans l’cueuie !
- J’y compte bin ma aoussi
- Et ta, Fifine qhi qu’tu vâes faire ?
- Maï ? eune indéfrisab’
- On n’dit pue indéfrisab’ Mame Fifine, astoure c’est bin pue soup’ !
- Jé n’veuie point ête frisée comme eune berbis non pue.
- Vénez don illé , Mame Torine, j’allons nous mette es mêches.
- Jé cré qué tout l’la va bin t’aller, et Jack va t’faire çà net bin
- Ergarde don, on dirait eun sapin dé Noé o toutes mes papillottes !
- Vère ou bin eun carnava !
- Ian, mée v’allez vair mes belles, lé monde ne vont pâs vous r’qéneute ! A vous asteure Mame Fifine
- V’allez ti m’mette les bigoudis si lourds sue la tête
- Mée nân’ni, çà n’sé fait pue, jé vâes jusse vous mette eun produit, et des p’tits bigoudis, aprée i s’ront bin soup’. Pi, v’arez eun couéfaège, v’allez vair, l’la s’ra vra bin
- Et si vous mettiez eun p’tit d’blleu, pasqué mes païs bllancs , j’y tiens, j’aime pâs les vâe pissoues.
- Bien, r’gardez don comm’ v’êtes bin d’même Mame Fifine
- Attendez Mame Torine , o l’est prête , côr eun p’tit coup d’peigne ….
- Eh ! Bin, mesdames, vous v’là des belles jiènes femmes astoure !
- C’est vra Torine, j’avons rajièni d’dix ans d’eun coup !
- Bin pouégnée, bin chaoussée, eun couêffe est à mouétié habillée…..
Pour s’y r’c’neute
Déblâmes = pardonnes
L’païe = le poil, les cheveux
les gotons = les mèches embrouillées disgracieuses
pissoues. = ternes , jaunis
Bin pouégnée = bien peignée ( dicton )