Ya pâs d’âge pour ête amouroue - No 44

Ya pâs d’âge pour ête amouroue

-         As-tu ouit dire Fifine que la Yéyette tait amourouse ?

-         Non ! à son âge ? O l’a bin quatrévint qhioc annéyes ! qheue veille folle !

-         Ian, o dé ava pue d’quatrévint ; N’empouêche qu’ol tait tourjoue trisse comme lé diab’ à Pâques et la v’la toute erqhinqhée, on dirait l’soula !

-         Pâs dé dieu possib’, o foleille tout comme !

-         Nan’ni, j’en sé pâs si sûre, pasqu’o l’avait z’eue bin du chéripé o son vieux bonhomme qu’tait tourjou grichu , vair monvais o ielle qué ma faïs ava eun p’tit d’bonhour l’la n’fait d’ma à personne.

-         Qhic qu’en disent les garçailhs ? L’la lou va ti bin ?

-         D’abôrd, les garçaîlhs, i n’ont rin à dire, mée jé cré ava ouit dire, qu’i l’taint bénèzes. N’est pâs ieues qui vont v’ni pâsser lous sérées o ielle. Tu sais bin ête toute soule à longheur dé journée, c’est bin long.

-         A c’qué j’voué, l’la lou tire eune épille du pied.

-         I sont , dis-je ma, surtout bénèze dé sava lou mêre chouchoutée, comme o n’avait jamée té.

-         Et son boudet ? qheule âge qu’i l’a ?

-         Eun p’tit pue qu’ielle jé cré, et lu aoussi tait tout sou. L’la va net bin , surtout qué lu, comm’ ielle sont émangnés sur toutes les maniêres, i vont s’ent’sout’ni.

-         Tout comm’ à l’âge là ! châe en amour, v’la qu’est pâs banal, lé monde vont rire sue ieues !

-         Les veues qui rirons, s’ra d’la jalous’té, et pée si n’sont pâs amouroues comm’ si avaint vint ans, i sont amitioues comm’ à quatrévint. L’la est vra bin d’même pâs vra Torine ?

FDBN

Pour s’y r’c’neute :

o foleille = elle affole

eune épille = une épine

émangnés = estropiés