I s’y prend comme eune treille qui rame des pées No 32

I s’y prend comme eune treille qui rame des pées

Si j’té dis qu’i s’y prend comme eune treille qui rame des pées ? Est lu qui veuie faire eun travailh et qui s’y prend mal. N’est vantiée pâs qu’est eun maladré, mée i s’n’sait pâs t’ni son martet ou son râtet s’lon l’boulot qui veuie faire. J’pourrâes dire aoussi qui s’y prend comm’ eun manche.

Mettons , eune treille dans eun courti, fi d’garce, o va r’vinger et mette tout sans d’sue d’sous. eune vraïe festécâille. Y ara pue d’boulot à r’mette tout l’la en pllace. T’as comprins qué n’est pâs sue ielle qui faout compter pour ramer tes pées.

Est pareilh si tu mets eune couêffe à qheute les z’haricots dans l’courti et qu’o s’met à arraècher la chouchée n’est pâs côr ielle qui faout pour faire du bon boulot.

Comme la veute qu’ essieue son ménaège sans l’ver les bébiaoues qui sont d’sus ou qu’est assez paute pour en câsser qhocs euns ; O n’sait pâs s’y prende !

Tu n’n’as pllein d’z’affaires dé même . bin souvent avant d’sava travâillé les jiènes on ardi d’ma à faire tout comm’ i faout, et qhocs faïs l’la va pue vite dé l’faire ta même.

Mée n’est pâs comm’ élla qui z’apprenrons  à bin travâiller.

Pour s’y r’c’neute :

eune treille = une truie

r’vinger = chambouler

à qheute = à cueillir

la chouchée = la souchée = la souche

paute = maladroite