Canalblog
Editer l'article Suivre ce blog Administration + Créer mon blog
Publicité
Et si on caousait Gallo
Publicité
Et si on caousait Gallo
Archives
Derniers commentaires
Et si on caousait Gallo
24 février 2011

Vêprées o les élèves de Gallo

Traes Vêprées o les élèves de Gallo à Vovonne !

 

Lundi à Loudia .

La permiêre vêprée fut à Loudia, o les permiêres ? Des jiènes déjà bin qheurus d’gallo, o des intonâtions et eun bon accent, i faout dire qué dans l’éqhipe, qhocs euns font du thiâte o les préchous d’Loudia.

Pour qhi faire des rencontes dé même. Pour lou montrer qué l’gallo n’est pâs rin qu’du folklore, qué i y a côr du monde qui l’caousent dépée lou v’nue au monde. Jé sé bin haètante de vair qué pour la pue part i sont dans eun milieu éyouc qu’çà caouse côr not’ langue.

Pourtante dans la clâsse là i avait eune jiène loraine d’orine, c’est i pâs biaoue d’vair les garçâilles s’interresser à nos racines..

J’lou fis traes  lectures : eune sue les amours d’aotes faïs

                                       Eune aote sue lé permier examen à savair l’entrée en 6ième

                                       Et eun conte dé Noé (texe qui avaint  étudié en clâsse)

A part qhocs mots , i z’avaint comprins l’essentiel, et toutes lous qhessions futent pôsées en gallo.

 

Mardi o les 5ième dé Plémet( Pllémet)

 

J’les avâes déjà veuie l’année derniêre, i s’en rapplaint bin et comme l’année derniêre i z’avaint préparé eun interviu.qui portait sue ma vie dans mes jiènes années, mes bêtises… (j’avions ti l’temps d’en faire seulement ?)

I z’ont té attentifs et ont erlévé les mots qui n’c’neussaient point et qu’j’ai du espliquer.

Comme dans lou qhessionnaire il tait mention dé l’iaoue, j’lou ai leue eun texe sur l’iaoue dans les années 45/50 texe pédagogique surtout astoure qu’on nous d’mande dé n’pâs la gaspiller .

Toues les texes lus sont illé sue mon blog

 IMGP8406

Jeudi o les 6ième à Pllémet tourjou

 

Là, c’est les poussous comme les appelle Vovonne.

Tait la clâsse la pue chergée, eune dizaine jé cré ( i y avait d’absents)

I z’ont té toues vra sages , i z’ont acouté mon conte vra long : Autour du boué d’Biaouboué.( non publié)

On voué qui z’ont déjà bin travâillé, i faout dire qui i z’ont chouési l’gallo est qu’ça lou caouse eun p’tit : <>

Bin jé sé contente, Vovone à d’mandé dé faire eun résumé pour vair c’qui z’ont r’tint d’tout l’la, et bin lé même gamin à fait tout sou l’résumé. Les aoutes ont r’tint des détâils comme à sava c’qu’tait des fênes, eun rouet, eun gourbi etc…

Pour m’ermercier , i z’ont z’euie la gentillesse dé chanter eune petite chanson : la Biqhette !

Si j’peu j’la mettrais illé lou p’tite chanson.

V’la traes r’ciées bin remplies, mée çà pâsse bin vite. J’verrons eune aoute faïs vantiée. Est les garçâilles l’av’nir , espèrons qui les profs dé gallo pourront continuer lou boulot !

Publicité
Publicité
Commentaires
Publicité